Showing 5 Result(s)

Museos mariñeiros en Galicia: Museo do Mar de Rianxo

Autor/a: Alba Campillo Gómez

O mundo mariñeiro de Galicia dáse a coñecer e divúlgase a través de diversas formas, pero a labor que exercen os museos e exposicións dedicadas a isto é fundamental.

Un dos máis destacados museos marítimos da nosa terra é o Museo do Mar de Rianxo, situado nesta vila mariñeira da Ría de Arousa. Este museo, orientado á etnografía e antropoloxía, é o eixo principal do proxecto “Rianxo, o mar feito tradición” impulsado polo concello, de forma que nos amosa a vinculación de Rianxo coa cultura mariñeira e co mar. Concretamente, sitúase na Praza de Castelao, 13, na chamada Casa do Coxo, coñecida con este nome polo seu antigo propietario: un peculiar boticario de comezos do século pasado. Trátase dun edificio no centro da vila dividido en tres andares, nos cales pódese aprender dende como se constrúen as embarcacións tradicionais a como se desenvolve a labor extractiva dos oficios do mar.

SALAS DO MUSEO

No primeiro dos andares atopamos maquetas de embarcacións tradicionais, así como información sobre a súa construción e funcionamento e tamén unha pequena biblioteca que alberga material de lectura vinculado co mar.

Na planta baixa ten unha exposición relativa á relación dos rianxeiros co mar e a pesca. Xa chegando ao soto, este museo alberga un obradoiro de carpintería de ribeira, no
que podemos ver as ferramentas do carpinteiro, mostras de madeiras ou unha rede de pesca en construción.

Museo do Mar de Rianxo. Horario: de luns a venres de 08:00 a 15:00 e domingos de 09:00 a 15:00

VISITAS

O museo pode visitarse de maneira independente de luns a venres de 08:00 a 15:00 e domingos de 09:00 a 15:00, pero tamén en grupos guiados a través de reserva previa por teléfono (+34 981 860 808) ou correo electrónico (museodomar@concelloderianxo.gal).

OUTROS MUSEOS

Pero o Museo do Mar non é a única alternativa museística ao redor do mar en Rianxo. Se queres mergullarte por completo na súa tradición mariñeira, o mencionado proxecto promovido polo concello rianxeiro, “Rianxo, o mar feito tradición”, inclúe outros museos vinculados.

Na Aula Activa do Mar conciénciase ao visitante da importancia de respectar o medio mariño e de empregalo de maneira sostible, ademais de dar a coñecer a cultura mariñeira. Esta aula é creación de alumnos e alumnas da Escola Obradoiro Xeiteira, en concreto, da especialidade de actividades náutico-turísticas. Da mesma forma que o Museo do Mar, tamén acolle visitas guiadas pero, ademais, distintos talleres e obradoiros ao longo do ano.

Aínda que non tan relacionados co mar, a Casa Museo de Manuel Antonio e o Museo de Nós Nuco constitúen tamén parte desde proxecto.

Na Casa Museo de Manuel Antonio coñécense diversos aspectos da vida do autor, e no Museo de Nós Nuco o artista local e carpinteiro de ribeira xubilado Robustiano Losada, chamado “Nuco”, expón decenas de obras escultóricas ligadas á cultura e sociedade de Rianxo.

Antiga foto do Porto de Palmeira. Foto de: Arqueoloxía Barbanza en facebook

Aula Activa do Mar de Rianxo.

Antiga foto do Porto de Palmeira. Foto de: Arqueoloxía Barbanza en facebook

Casa-Museo Manuel Antonio. Rianxo.

Antiga foto do Porto de Palmeira. Foto de: Arqueoloxía Barbanza en facebook

Retratos de Nuco Losada Romero, Escultor posando coa obra. Museo de Escultura de Nós Nuco. Rianxo.

Finalizada esta ruta cultural pola historia marítima rianxeira, estades preto de Benboa Corrubedo, un dos locais Benboa nos que deleitarse con esta cociña típica atlántica con produtos sostibles e locais.

 

Aportacións, suxerencias, agradecementos…? Anímate a deixar un comentario neste artigo de Alba!

 

ALBA CAMPILLO Gomez

O meu nome é Alba e recentemente gradueime en Turismo e Ciencias Empresariais pola Universidade da Coruña.

Actualmente son guía turística nun museo, onde comecei compaxinando o final dos meus estudos e a realización dos meus traballos de fin de grao co labor de guía.

Son de A Coruña, pero a miña familia materna é do Barbanza, polo que sempre sentín un grande apego á cultura mariñeira, motivo polo cal nun dos mencionados traballos centreime en estudar o turismo mariñeiro desta zona, como unha maneira de dar visibilidade e poñer en valor este tipo de turismo tan arraigado á cultura marítima galega.

Suscríbete a listaxe «Todas as novas» do noso blogue para recibir as novidades en turismo mariñeiro no teu correo!

Quero recibir información da listaxe de:

¡Non enviamos spam! Lee a nosa Política de Privacidade.

6 aloxamentos para amantes do mar na provincia da Coruña

Foto en portada: Hotel O Semáforo de Fisterra

Traduce el texto/Translate

Autor/a: Alba Campillo Gómez

A oferta aloxativa de Galicia é moi ampla e diversa, pero nesta publicación traémosvos unha proposta de establecementos de temática mariñeira por toda a provincia da Coruña. Ademais, neste artigo te indicamos de que Benboa te atopas mais preto para que a experiencia sexa totalmente con sabor a mar.

A CORUÑA

Comezando máis cara ao norte, atopámonos en Pontedeume co Hotel A Falúa, hotel de oito habitacións orientado ao mar e situado nunha casa mariñeira tradicional no centro desta vila. Trátase dun hotel de temática mariñeira con oferta de ocio de actividades relacionadas con este tipo de turismo e co turismo activo, polas inmediacións da Ría de Ares e das Fragas do Eume. Perfecto se estás a pasar uns días pola zona da Coruña, aproveitando para visitar o local de Benboa situado en pleno centro desta cidade.

Pontedeume. Foto: Raúl AB

Pasando do Golfo Ártabro á Costa da Morte, temos outra modalidade de aloxamento coa que mergullarnos no mundo mariñeiro: as Cabanas de Vendaval, campamento de
turismo de bungalows en Barizo, Malpica. Está composto por cinco cabanas de madeira de tipoloxía mariñeira nas que podes disfrutar dunha estancia de desconexión nesta comarca de Bergantiños, contando, ademais, cunha exposición de antigas ferramentas de carpintería de ribeira.

Foto As Cabanas de Vendaval

SANTIAGO

A continuación, descubrimos o Hotel La Marina, no camiño pola Costa de Morte en dirección sur, en concreto, no concello de Cee. Neste caso, o hotel conta con 32 habitacións ambientadas como camarotes e un espazo de divulgación enogastronómico, para poder vivir ao 100% a experiencia mariñeira desta zona de
Galicia.

Moi preto desta última estancia, chegamos ao fin do mundo, cun dos hoteis máis particulares e emblemáticos de Galicia: O Semáforo de Fisterra (foto en portada). Integrado no propio Faro de Fisterra, non conta só con servizo de aloxamento, composto por cinco habitacións únicas fronte ao mar galego, senón tamén cun restaurante, unha taberna mariñeira e ata un pequeno centro de interpretación. Poderás así disfrutar de primeira man da cultura marítima tan arraigada aquí, sen dúbida nun enclave inmellorable.

Estas dúas últimas opcións de aloxamento atópanse máis cerca de Benboa Compostela, de forma que se queres percorrer este tramo do Camiño de Santiago a Fisterra, tes así unha excelente opción gastronómica na capital xunto con dúas alternativas de aloxamento no final do itinerario.

CORRUBEDO

Xa ao ir descendendo cara ao remate da Costa da Morte, rumbo ás Rías Baixas, atopamos en Carnota o Hotel Faro de Lariño, outra estancia nun faro que xurdiu tras o éxito do de Fisterra. Os xerentes deste último puxeron en marcha estoutro aloxamento fareiro formado por nove habitacións, que inclúe tamén un centro de interpretación, unha taberna con produtos mariñeiros e unha tenda con artesanía local.

Faro de Lariño antes de ser reconvertido en hotel.

 

Concluímos esta ruta pola máis destacada oferta aloxativa mariñeira da provincia da Coruña co Hotel Porto de Muros Camiño Inglés. Este edificio, situado no casco
histórico da vila de Muros e a escasos metros do porto pesqueiro, dispón de 12
habitacións, parte delas con vistas ao mar. Ademais, na parte subterránea alberga unha biblioteca especializada na historia marítima de Muros.

Dende aquí, estamos máis preto de Benboa Corrubedo, onde poderíamos rematar o
percorrido mariñeiro pola costa da provincia coruñesa con gastronomía de proximidade das rías e mares de Galicia.

Aportacións, suxerencias, agradecementos…? Anímate a deixar un comentario neste artigo de Alba!

 

ALBA CAMPILLO Gomez

O meu nome é Alba e recentemente gradueime en Turismo e Ciencias Empresariais pola Universidade da Coruña.

Actualmente son guía turística nun museo, onde comecei compaxinando o final dos meus estudos e a realización dos meus traballos de fin de grao co labor de guía.

Son de A Coruña, pero a miña familia materna é do Barbanza, polo que sempre sentín un grande apego á cultura mariñeira, motivo polo cal nun dos mencionados traballos centreime en estudar o turismo mariñeiro desta zona, como unha maneira de dar visibilidade e poñer en valor este tipo de turismo tan arraigado á cultura marítima galega.

Suscríbete a listaxe «Todas as novas» do noso blogue para recibir as novidades en turismo mariñeiro no teu correo!

Quero recibir información da listaxe de:

¡Non enviamos spam! Lee a nosa Política de Privacidade.

Festas e tradicións do mar en Galicia: A Festa da Dorna de Ribeira.

Foto portada: Dorna_ en Flirck

Traduce esta página/ Translate

Autor/a: Alba Campillo Gómez

A nosa comunidade é coñecida pola inmensa variedade de festividades que nela se
celebran ao longo de todo o ano. As festas galegas concéntranse especialmente no
verán, e moitas delas teñen como fío condutor un dos elementos vertebradores da
cultura da nosa terra: o mar.

Festa da Dorna de Ribeira

 Unha das festas relacionadas co mar que se celebra cada ano na provincia da Coruña é a Festa da Dorna, no municipio de Ribeira, preto do primeiro dos locais de Benboa: Benboa Corrubedo. Esta festa, declarada Festa de Interese Turístico de Galicia en 2005, leva festexándose máis de setenta anos neste concello do Barbanza.

Orixe da festividade

A súa orixe remóntase a 1948, cando un grupo de amigos decidiron recrear unha
pequena maqueta dunha dorna e celebrar a súa botadura, con motivo do sorteo dunha destas embarcacións tradicionais para recadar cartos para a Festa do Virxe do Carme, patroa do mar. Estes amigos simularon que a dorna rifada lles tocara a eles, aínda que non fora certo, e para organizar a celebración deste feito crearon a Real e Ilustre Cofradía da Dorna, asociación cultural que aínda hoxe en día é a encargada de desenvolver as actividades que compoñen esta festa. Desta forma, o acto que comezou como unha broma entre algúns veciños de Ribeira segue a ter lugar cada 24 de xullo, véspera do día de Santiago Apóstolo.

Ons, dorna, anos 60. Foto Staffan Mörling.

Ons, dorna, anos 60. Foto Staffan Mörling.

Actividades dorneiras

O humor e a retranca galega son protagonistas nesta festa, na que cada unha das peñas dorneiras, formadas por agrupacións de xente da zona, colaboran e participan nalgunha das actividades do festexo. Hoxe en día son decenas de peñas con miles de integrantes.

Dende o nacemento da Festa da Dorna ata a creación das peñas dorneiras en 1988, as principais actividades foron o “Baile da Dorna”; os “Exames de patróns”, unha chistosa maneira de dar entrada na Real e Ilustre Cofradía da Dorna a novos integrantes a través de sobornos ao tribunal; ou o “Top Secret”, actividade que parodia eventos da actualidade política e social do momento.

Todas estas tradicionais actividades seguen a realizarse cada ano, pero nas últimas décadas xurdiron outras como o “Sertame itinerante de cansión de tasca”, no que as peñas recitan cantigas nos bares; a carreira e exposición de carrilanas “Jran Prix de carrilanas”; ou o “Jran Premio Ícaro de voo sen motor”, divertido encontro no que os peñeiros e peñeiras saltan dende o porto ao mar empregando enxeñosos aparellos. Aínda que os festexos duran varios días, o 24 de xullo ten lugar o evento máis destacado da festa: “Rejata de embarcasións feitas á machada e propulsadas a pan de millo. Jran Premio Cutre Sark”, na praia de Coroso, acompañada de gastronomía e música.

Para rematar esta celebración á que asisten milleiros de persoas cada ano, organízase un concerto de fin de festa no Paseo do Malecón de Ribeira, que conclúe coa interpretación do himno dorneiro “24 de xullo”.

 

“Jran Premio Ícaro de voo sen motor” Foto: Dorna_ en Flirck

Forsa á Dorna! Vento en popa!
Con jalerna ou en calmada
que non se sabe no mundo
doutra festa máis rachada.
Forsa ás peñas dorneiras,
a mellor tripulasión
esparando as “pañoletas”
ao son do acordeón.

Ademais, todo o programa de actividades e eventos da festa se recolle no Caderno de Bitácora, coa particularidade de estar escrito coa gheada, seseo e cheísmo típicos do
Barbanza. A Festa da Dorna é, por tanto, unha representación ideal da cultura marítima e mariñeira da nosa terra, moi arraigada xa na poboación galega e á que cada vez acode xente de máis sitios, polo que non podes perder a oportunidade de desfrutar desta festa popular se visitas Ribeira no verán.

 

 

Aportacións, suxerencias, agradecementos…? Anímate a deixar un comentario neste artigo de Alba!

ALBA CAMPILLO Gomez

O meu nome é Alba e recentemente gradueime en Turismo e Ciencias Empresariais pola Universidade da Coruña.

Actualmente son guía turística nun museo, onde comecei compaxinando o final dos meus estudos e a realización dos meus traballos de fin de grao co labor de guía.

Son de A Coruña, pero a miña familia materna é do Barbanza, polo que sempre sentín un grande apego á cultura mariñeira, motivo polo cal nun dos mencionados traballos centreime en estudar o turismo mariñeiro desta zona, como unha maneira de dar visibilidade e poñer en valor este tipo de turismo tan arraigado á cultura marítima galega.

Suscríbete a listaxe «Todas as novas» do noso blogue para recibir as novidades en turismo mariñeiro no teu correo!

Quero recibir información da listaxe de:

¡Non enviamos spam! Lee a nosa Política de Privacidade.