O acne

O acne é unha enfermidade multifactorial e inflamatoria. Afecta entre un 79 e 95% da poboación adolescente; en maiores de 25 anos diminúe ata un 40 ou 54%; en mulleres adultas, un 12% e o 3 % dos homes seguirá tendo lesións de acne.

Factores que o complican

Aínda que ten un compoñente xenético, existen diversos factores que poden favorecer a súa aparición. Entre estes factores están a alimentación, as hormonas sexuais alteradas por situacións comúns ou patolóxicas, cosméticos que obstrúen os poros, medicamentos como anticonceptivos, inmunosupresores, contaminantes ambientais, climas cálidos e húmidos, estrés e o exceso de graxa corporal, Diabetes Mellitus tipo 2 ou Síndrome de Ovario Poliquístico.

Previr e reducir é posible

Centrándonos na alimentación, aínda que non exista unha dieta “antiacne”, podemos realizar cambios na alimentación que axuden a previr a súa aparición e/ou reducir a súa severidade.

O consumo de ácidos graxos omega-3 axuda diminuíndo a inflamación e reducindo significativamente a cicatrización. Os principais ácidos graxos omega 3 son o ALA (ácido alfa linolénico), EPA (ácido eicosapentaenoico) e DHA (ácido docosahexanoico). As fontes principais de EPA e DHA atópanse nos peixes azuis (atún, salmón, sardiña, anchoa…) e aceites de pescados. E as fontes de ALA son os froitos secos, sementes e aceite de colza.

Tamén existen outros alimentos que aportan omega 3, aínda que sexa en menor medida. Son por exemplo as espinacas, leituga, aguacate, crema de cacahuete e avena.

A continuación móstrase unha táboa con contido dos diferentes tipos de omega 3:

A maiores do omega 3 outros alimentos tamén poden contribuír de forma positiva e negativa contra o acné.

Andrea Paramos Torreira (A Baña, 1999) estudei Nutrición Humana e Dietética na Universidade de Santiago de Compostela, no campus Terra de Lugo. Dietista – Nutricionista con gañas de poder axudar a xente en cambiar os seus hábitos alimentarios, e así contribuír a unha mellora da súa calidade de vida.

Atópame no facebook : Andrea Paramos Nutricionista

A auga. Beneficios dunha boa hidratación.

A auga supón entre o 50 e 60% do corpo e está dividida no líquido intracelular (dentro das células) e o líquido extracelular (que está arredor das células e o plasma). Normalmente, os niveis de auga do corpo mantéñense, pero a súa distribución pode variar moito.

A auga é un elemento esencial para a vida, xa que entre as súas funcións destacan a de manter a temperatura corporal, transportar os nutrientes ata as células e eliminar os elementos de desfeito da utilización dos nutrientes polo organismo.

Unha hidratación adecuada é esencial para a saúde e benestar. Axuda a manter o cerebro en alerta, aporta o osíxeno e nutrientes necesarios as células para que poidan producir a enerxía, axuda na absorción dos nutrientes, mantén a tensión arterial dentro dos límites saudables, axuda aos riles na eliminación de residuos e nutrientes innecesarios a través da urina e actúa como termorregulador corporal.

A hidratación

As necesidades de inxesta de auga veñen determinadas por factores como a idade, o sexo e o peso corporal. Ademais, existen outras circunstancias que se debe consumir unha maior cantidade de auga para compensar os incrementos da eliminación, como por exemplo, a práctica de actividade física, alteracións relacionadas coa saúde (vómitos, febre, diarrea) e os climas cálidos por exemplo..

A Autoridade Europea de Seguridade Alimentaria (EFSA) establece o consumo de 2,5 litros de auga ao día para a poboación masculina adulta e de 2 litros diarios de auga para a poboación feminina adulta. Nos nenos entre 9 e 13 anos, o consumo recomendado é de 2,1 litros diarios e para as nenas; 1,9 litros ao día.

A sede

Con frecuencia, dise que a sede debería servir de guía para beber, e polo tanto, os valores anteriormente mencionados, serían inxestas adecuadas para manter un estado de hidratación adecuado, pero non serían uns requirimentos estritamente a cumprir.

No noso corpo existen unhas células especializadas do cerebro (osmorreceptores) que detectan a diminución da auga celular e desencadean o mecanismo da sede, é dicir, a busca e a inxesta de auga.

Moitas veces, o mecanismo da sede, vese alterado, co cal, esa sensación de sede diminúe. Este mecanismo vese afectado pola idade e por determinados medicamentos.

Bebidas e alimentos

A inxesta de auga diaria total é a suma do contido de auga provinte das diferentes bebidas e de alimentos.

Segundo a EFSA, entre o 70 e 80% da hidratación diaria debe provir de diferentes tipos de bebidas, preferiblemente auga, e o 20 e 30% restante, é aportado a través da inxesta de alimentos sólidos.

A continuación, móstrase unha táboa co contido de auga en moitos alimentos.

Andrea Paramos Torreira (A Baña, 1999) estudei Nutrición Humana e Dietética na Universidade de Santiago de Compostela, no campus Terra de Lugo. Dietista – Nutricionista con gañas de poder axudar a xente en cambiar os seus hábitos alimentarios, e así contribuír a unha mellora da súa calidade de vida.

Atópame no facebook : Andrea Paramos Nutricionista